Nuorttanaste

Sámi Biibbal lea searvi maid muhtin biibbalberošteaddjit leat ásahan. Sin áigumuš lei Lars Hætta jorgalan Biibbala čállit ođđa čállinvuohkái. Sámi Biibbal álggahii 2009:s barggu čálihit Ođđa Testameantta ja Sálmmaid girjji ođđa čállinvuohkái ja dál lea dat bargu gárvvistuvvon.

Nils Aslak O. Eira, Sámi Biibbalis, muitala ahte eai sii árvidan man stuora bargu dát lei. Álggos lei buot Ođđa testameantta girjjiid čállit ođđa čállinvuohkái. Dán sáhtii dihtorprográmma ieš bargat go govve juohke siidu dihtorii. Dasto lei lohkat lea go dihtor čállán buot sániid nu mo galget ja divvut čállinmeattáhusaid. Dasto dárkkistit lea go jorgaluvvon riekta sisdoalu dáfus. De fertiimet buohtastahttit greikka- ja hebreagielaid vuođđoteavsttaiguin ja maiddái dárogielat teavsttaiguin. Loahpas ges dárkkistit giela, ja divvut čállinmeattáhusaid. 6 jagi ádjáneimmet, ja dál lea girji gárvvis, ja vuovdimassii.

 

Váldde oktavuođa Kárášjoga girkodulkkain Anne-Marit Eira Antiin, jus háliidat oastit Ođđa Testameantta.

 

Čállán Anne-Marit Eira Anti

ASNNuorttanaste stivra lea borgemánu 18.beaivvi virgádan ođđa doaimmaheaddji.

Ođđa doaimmaheaddji lea Ann Solveig Nystad. Son álgá doaimmaheaddjibargui čakčamánu 1.beaivvi

Nystad lea Kárášjogas eret. Son lea ovdal bargan doaimmaheaddjin Nuorttanastes 1992-2003, 2011. Son lea maid vuosttaš nissonolmmoš gii lea leamaš Nuorttanaste doaimmaheaddjin ja lea maid vuosttas doaimmaheaddji maŋŋá go Nuorttanaste ásahuvvui vuođđudussan jagis 2000.