Nuorttanaste

Nuppi vahkkoloahpa čuoŋománus ledjen bajit- Molleža duottarstobus idjadanmátkkis.

Dálueamit, Margit Eriksen Opgård, muitalii iežas gussiid vuorddašeamen… fat-bikeriid.

Áicájin vihtta albmá lahkoneamen duottarstubu… duolbmansihkkeliin!!!

Ahaa… fat-bikerat, jurdilin.

Go lahkonišgohte duottarstobu… jo bat de okta čuoggasii ja guhpirdii stivrrana badjel.

Bivastuvvan ja váiban albmát viimmat ollejedje guđa tiimma sihkkelmátkkis Gárdinis.

Mii eará guossit šattaimet sáhkit.

Háliideimmet diehtit mii ipmašiid sin doalvu meahccái sihkkeliiguin dáid soavlemáđiid ala. Albmát muitaledje ahte sii liikojit meahcis johtit ja rupmaša geavahit ja maiddái lea vuogas dán láhkai beassat eret dábálaš árgabeaivvi hommáin.