Nuorttanaste

Tove LillGirkočoahkkin lea muhtin jagiid dás ovdal mearridan Sámi girkoeallima strategalaš plána. Okta áigumuš lea nannet bargiid máhtu sámi kultuvrras ja kultuvrralaš máŋggabealatvuođas. Girkolaš oahpuin Norggas eai leat sámi fáttát ja girkolaš bargit eai beasa oahppat sámi kultuvrra birra. Dan muitala Sámi girkoráđi ráđđeaddi Tove-Lill Labahå Magga. Son čilge ahte danin Sámi girkoráđđi Norggas lea álgán doallat kurssaid. Cuoŋománus Sis-Finnmárkku báhpat ja eará girkolaš bargit ožžo kurssa Kárášjogas. 

Labahå Magga dadjá ahte ii leat doarvái guođđit ovttaskas olbmuid duohkái báikkálaččat dan barggu ahte oahpahit girkolaš bargiid sámi kultuvrra birra, dannego girkolaš bargit han dárbbašit leat profešunálalaččat iežaset kulturmáhtus. Ovdamearkka dihte lea dehálaš diehtit erohusa kulturáddejumis ja kulturmáhtus, čilge Labahå Magga ja dadjá ahte go lea kulturáddejupmi, de olmmoš lea dihtomielalaš dasa ahte buot olbmuin lea kulturduogáš, sápmelaččain ja ii-sápmelaččain. Du kulturduogáš dahká ahte dus lea gelbbolašvuohta dan kultuvrras mas don leat bajásšaddan ja leat. Kulturáddejupmi máksá ahte don dieđát erohusa dan kulturduogážis mii dus alddát lea, ja ahte dus lea kulturmáhttu iežat álbmoga dahje eárá álbmogiid kultuvrras. Sámi kulturmáhttu don oahpat skuvllas, kurssain ja allaskuvllain ja dat lea formála máhttu. Sámi kulturmáhttu hábmejuvvo sámi áigečállagiid, sámi aviissaid, sámi skuvllaid, Sámi allaskuvlla ja eará sámi ásahusaid olis. 

Čállán: Ravdna Turi Henriksen

Loga eanet Nuorttanaste nr. 6- 2016